Item, ivi era et stava el vescovo di Cervia de Coleonibus, el qual, per operation che fece con monsignor di Arzenton quando ivi a Ferara fue, hessendovi Zuam Francesco Pasqualigo doctor et cavalier vicedomino nostro l'anno passato, non era in molta gratia di la Signoria, et non ossava vegnir in questa terra, dubitando etc. Conclusive, esso vicedomino disse gran ben dil ducha et di l'honor li havia facto quando si partì, et che Ferara era mutata di quello era prima, et che più non haveano devution a Franza.
     
      Item, che 'l signor haveva facto levar le bollete di Ferara et di Modena, et questo perché haveano fama di esser molto ingorde, e tamen el ducha ne trazeva pocha utilità. A hora che son levate, li altri dacii et maxime le hostarie verano a cresser; cossa fé che zà molti anni non fu facta.
     
      Item, che Ferara era molto povera, et chi privasse che non havesse li comerchii con questa terra, sarebeno disfati dil mondo etc.
     
      Item, che 'l ducha sempre va in careta con il suo medico da presso, el qual mai di lui si diparte, imo dove el va li va driedo.
     
      Item, che se intendeva el marchexe di Mantoa havia dato danari a le sue zente del suo, licet fusse casso, e quelle volea tenir, et che l'era a Gonzaga loco suo, dove spesso vi suol habitarvi. Et che 'l signor ducha di Ferara era venuto molto catholico. El qual havia quatro figlioli legitimi et uno natural, zoè: don Alfonxo di anni 22 in cercha, don Ferante ch'è in Franza di anni 21, el cardinal don Ypolito di anni 19, et don Sigismondo di anni 17, et il natural don Julio el qual è prete.