Et cussì el dito orator stete ... zorni in questa terra, et andoe al suo viazo verso Siena.
     
      È da saper, che, in questo tempo, si ritrovava in questa tera orator de' senesi, venuto zà doy mexi, uno zenthilomo lhoro, o per dir meglio citadino, chiamato domino Facio Benasai, el qual tratava con la Signoria cosse per la sua comunità, la qual al tutto si volleva abrazar con questa Signoria. Et a Siena, in questi giorni, morite domino Bulgarino de' Bulgarini doctor famosissimo, che alias fue in questa terra orator etc.
     
      Di Elemagna. Continuamente veniva lettere da Zorzi Pisani doctor et cavalier, orator nostro, el qual in questi giorni, sequendo la cesarea majestà, ritornoe a Yspruch, et ivi doveano tratar la materia di Goricia, la qual, ut multi dicebant, era cossa da conzar con danari, perché il re faria ogni cossa. Quello seguirà, scriverò poi. Et Zuam Piero Stella, zonto che fu ivi l'orator nostro, abuto danari da la Signoria di ritornar, tolto licentia dal prefato re di romani el qual li donoe nulla, et tornò in questa terra, et zonse a dì 23 dil sopradito mexe.
     
      [1497 08 09]
      A dì 9 ditto, hessendo il consejo di pregadi suso, gionse lettere di Spagna. Le qual erano molto desiderate, venute per mar per via di Zenoa, di ... zugno fin a lujo, conclusive, niente da conto. Primo: che 'l matrimonio col re di Portogallo et nepote era qualche controversia, la qual si adateria. Che l'era morta l'ynfanta di Navara la qual steva in corte dil re di Spagna quasi come ostasa. Era giovene di anni 10, chiamata dona ... Quanto al mutar del loco di far la consultation de pace tractanda con Franza, non è possibile altrove se non a Monpoulier et ivi intorno.