Et la seconda deliberation che 'l dovesse andar in Levante, ancora non era stà expedita. El qual capitano si sapeva che l'era per andar a Corfù etc. A l'incontro, Domenego di Prioli savio di ordeni messe che 'l dovesse star fuora, maxime per asegurar le galie di viazi, et parloe. Li rispose Marco Bolani savio dil consejo. Tandem, fo preso che 'l dovesse immediate venir a disarmar in questa terra.
     
      In questi giorni, la farina in fontego cresete, et ne era pocha, licet fusse el principio di l'arcolto. Et per esser stà questo mexe poche pioze, li megi si sechoe, adeo, judicio omnium, questo anno saria gran carestia di formento, quod Deus avertat.
     
      Da Napoli, di Marin Zorzi doctor et cavalier orator nostro. Chome in quel regno era più disturbo che 'l fusse mai stato, et che il re, havendo mandà a chiamar tutti li baroni dovesse venir a la sua incoronatione, la qual si doveva far a dì 6 di questo, ancora non erano venuti, et che il principe di Salerno non vi volleva vegnir. Et il cardinal Valenza legato apostolico era zonto a Capua con cavalchature 700, et che 'l daria gran spese al re, el qual è [710] poverissimo. Et a dì 13 avosto, vene lettere come el ditto cardinal era amallato, et che la incoronation era stà deputata di far a dì 10 a Capua, et che non erano venuti li baroni. Speravano che 'l principe di Bisignano dovesse vegnir, perché havia scripto vegneria. In conclusione, in reame non li era nulla di buono.
     
      Da Roma. Come el pontifice feva zente. Havia soldato, come scrissi, Hercules Bentivoy homeni di arme 100; el signor di Piombin 150; uno Zuam spagniul, fo a soldo dil re Ferando, el qual vene in Italia con il re di Franza, con 50, et altri.