Or lecto dicte lettere, subito consultato la materia, fo risposo in Spagna. Et l'orator yspano era in questa terra existente, andoe la matina in collegio a dì 25, exponendo haver lettere da li regali, come el meglio saria di far armata contra francesi ivi in Spagna, et che la Signoria participasse etc. Unde, a la risposta consultato nel senato, li fo risposo, perché el rechiese ducati 60 milia, sichome per li capitoli di la liga eramo obligati. Et questo medemo l'orator yspano rechiese al ducha di Milano, et che era tempo di far exercito et armata, perché el vedeva el suo re che il re di Franza non havea voglia di vegnir ad alcuna conclusion di trieva ni de paxe, et che subito fossemo a novembrio, che finiria la trieva et era da proveder. Unde, a dì 26 ditto, consultato la materia nel consejo di pregadi, li fo risposo: chome la Signoria nostra era su grandissima spexa havendo convenuto ajutar tuta Italia; et che minazando el re di vegnir in Italia, era necessario da queste bande far valide provision per esserli a l'incontro, et saria bisogno ajutar el re don Fedrigo, per esser quel regno in gran garbujo. Et che si si vederà che el prefato re di Franza non atendese a le cosse de Italia, non solum questa summa, ma ogni mazor al bisogno a lhoro regal majestà se li manderia. A le qual havevamo mandati do nostri oratori, li qualli zà erano in camino.
     
      È da saper, chome in questo mexe, le 4 galie di Alexandria capitano Filipo da cha Tajapiera, andono al suo viazo con haver di cassa ducati 300 milia, senza le merce.