El qual tornoe dal re [738] referendoli era morbo, unde el re si dolleva, non potendo star a Lion a quelle sue done et inamorate. La raina era pur con lui, et si divulgava era graveda. Zuam Jacomo di Traulzi a Lion et stato dal re; doveva ritornar in Aste, et come per avanti intisi, era stato fato capitano dil roy di le zente ytaliane per andar in reame, et monsignor di Obignì di le francese.
     
      Di Savoia. El cardinal San Piero in Vincula, stato a Turin alcuni zorni, andoe a Chier. El qual tramava con Franza alcune cosse per pacifichar, et in questi giorni ritornoe a Turin per visitar el ducha et la duchessa che non si sentivano bene. Et Marco Zorzi orator nostro ivi era, et Mafio de Pirola orator milanese et il Boadiglia orator dil papa. Et è da saper, che il ducha di Savoia feva ogni cossa per far vegnir il re di Franza a la paxe, et molto amava la Signoria volendo esser bon italiano. Et a dì 23, Bertuzi Valier orator nostro zonse ivi assà honorato, al qual fu dato la comissione, cussì esso volendo, per pregadi. Et Marco Zorzi, a dì 25 si partì, et ritornò a la sua capetaniaria di Bergamo.
     
      Di Zenoa. Nulla da conto. La nave era preparada per li oratori a passar a Barzelona. Ancora ivi era Zorzi Negro secretario nostro, et in loco suo per collegio fo electo andarvi Marco Bevazan secretario, el qual di brieve dia partir et ivi andar nomine veneto.
     
      Da Ferara. El ducha a Modena adatava le cosse de Carpi, et con lui era don Ferante suo fiol venuto di Franza. In questa terra non era orator ferarese, perhoché quel domino Aldromandino era andato per adatar le diferentie con quelli di Ravena, dove era etiam Cristofal Moro podestà di Ravena.