Tamen, la verità di la cossa per il zonzer dil Sagudino de lì, se intenderà il tutto. Et per altre vie se intese come questo ducha Ulacho Carabodam, il re di Rossia, il re di Polona, et il re di Boemia et Hungaria havevano insieme fato liga contra turchi, et haveano zente in hordine per danizar a quelli confini. La qual nova saria perfectissima per la Signoria nostra e tutta Italia, acciò el Turcho atendesse a caxa soa, et non li venisse pensier di altrove. Quello seguirà, più avanti sarà scripto di tal materia.
     
      [1497 08 30]A dì 30 avosto, nel consejo di pregadi, fo decreto che la barza piccola patron Piero Contarini, che era al Zante e andava a fondi per esser stato assà mexi fuora, dovesse vegnir a disarmar. Restava la granda, capitano Andrea Loredam, che fin hora era stata in Cicilia, et l'altra, patron Daniel [741] Pasqualigo, la qual era stata in Levante, et andava a compagnar le galie. El capetanio zeneral di mar Marchiò Trivixam era zonto a Zara a dì ... de questo, et veniva a disarmar, justa la licentia data. Come zonzerà, sarà scripto di lui.
     
      Di molte terre di Levante era lettere a la Signoria. Come li populi si dolevano di molte extrusion facte per li rectori, et che aspectavano con desiderio li syndici electi. Et Piero Sanudo era in hordine; ma Luca Trun suo collega era amallato. Tamen, li fo per avanti dato termine fino a mezo setembrio, et si a quel tempo non era in hordine, fusse facto in loco suo etc.
     
      Li oratori nostri andava in Spagna, Antonio Boldù et Domenego Trivixam cavalieri, zonseno a dì 22 avosto a Brexa, et Zorzi Corner cavalier podestà li fé uno pasto.