Siché tute le galie erano sparpagnate. Conclusive, da mar a questi tempi era pocho hordine, et tutto era perché nostri non haveva paura dil Turcho, el qual tamen non havea bon animo etc. perché li era stà ditto venitiani rupe il re di Franza perché non andò contra turchi, come promesse, ma ritornava in Franza.
     
      Da Milano. Chome li do oratori nostri andavano in Spagna, a dì 27 avosto a hore 22 erano intrati in Milano, et el ducha, con li oratori e tuta la corte vestita di negro, more solito li erano andati contra. Et alozono a l'hostaria dil Pozo, et il zorno sequente, dapoi disnar, ebeno audientia. Demum, a dì 2 septembrio, partino per Zenoa insieme con li do oratori dil prefatto ducha, dove era preparato una nave per pasarli a Barzelona, sichome ho scripto di sopra. Et per lettere di Marco Lipomano orator nostro a Milano venute in questi giorni, se intese di la morte di domino Obieto dal Fiesco fratello di domino Joanne Alovisio genoese, el qual a Milano [746] stava volendo cussì el ducha. La qual morte era stà repentina molto, et si judichava el ducha lo havesse fato tosegar; ma la verità fu che uno cavalo li cadè adosso et morite.
     
      Nota. El ducha de Milam, per esser sepulta la moglie a le Gratie, va ogni zorno do volte ivi, né mai fallisse. Va vestito con zipon di fostagno negro, et uno mantello longo negro per corotto.
     
      Per avisi superiori, che 'l re di Franza haveva più fantasia che mai a le cosse de Italia. Doveva vegnir a Lion. Et per una lettera che vidi, come Zuam Jacomo di Triulzi havia mandato a dir al ducha de Milano che 'l si havia acordato con esso ducha con condition si al re piaceva, et che, a hora, el re non li havea voluto dar licentia.