Item, el ducha preditto fece apichar domino Hironimo de Becharia perché el volse dar Valtolina al re di Franza. Tamen, de loco streto l'havea slargato e fato che 'l posseva andar per el castello di Milan, e questo a requisition dil roy. Ma hora, lo l'à fato apichar. Tamen, questa venuta non era creta, [755] perché in Piamonte non era biave; ma intisi al tuto voleva venir, et havia licentiato tute meretrice di la sua corte, et lui redutosse a un viver più continente dil solito; et haver catà assà summa di danari.
     
     
     
      Capitolo di una lettera di Alexandria de 14 lujo 1497,
      scrita per Vetor Querini a Hironimo suo fratello,
      et zonta in questa terra a dì ... setembrio.
     
      Cercha a queste signorie dal Chajero, le cosse sta secondo el consueto. Tuti li signori sono, parte con el diodar scampati, e parte scosi nel Chajero, che sono Chartabei zambellati, Tinibech zumelli, Casom, che era de qui chorchomas de Chasom Chasumie. Non si sa la certeza, sono tutti asentadi. El Chajero sono in tre parte: una con el signor soldan, l'altra con el diodar, e la terza con li altri signori. Sono in molte controversie. Li schiavi de li signori morti, con parte di zilebi, voria che el signor soldam vestisse uno suo barba diodar, el qual tien da questi signori, fradelo di sua madre. Non ha voluto consentir. Se hano messo su le porte del castello; né volea lassar insir nisum signor di castello si non vestiva questo suo barba diodar. Li fo dato per Temeres bone parole: dapoi el signor soldam non si à mai dimostrato per non vestirlo, e Bulbacha Elmeziani, andando una matina a castelo, fo morto da uno mamalucho; non si sa cui l'abia fato amazar.