Molti veronesi, cremonesi, mantoani, parmesani, da Rezo, Modena, Piasenza, Pavia, Milan, Bergamo, Crema, che non se poteva alozar in quella terra. In summa, fo assaissima zente et molti patricii nostri. Et compita la zostra, tutti si partino, et tamen niun remor non di parole et mancho di fati seguite in quella cità, che fo bello. Et Zorzi Corner podestà scrisse qui et refudoe la podesteria, in loco dil qual a dì primo octubrio fo electo Marco Sanudo era cao di X.
     
     
      Sumario di una letera di Andrea Loredam capitano di le nave armade,
      scrita ad Antonio suo fradello, data in nave a dì 22 avosto,
      et risposta a dì 15 septembrio 1497.
     
      Fradelo carissimo. Non ti havendo scrito zà molti zorni, sì per el navegar mio continuo, como per non haver auto pasazi. L'ultima mia fo a dì 19 zugno a la vela sopra la Fagagnana, et a dì 21 mi soprazonse el barzoto patron misier Piero Contarini. Et essendo per levarmi da la Fagagnana et conferirmi verso Cavo Bon, ebbi inteligentia atrovarse sopra le aque de Palermo uno corsaro francese con due barzoti, qualle andava a roba de tutti, come se divulgava. Per le qual nove, non me posendo transferir verso quele aque, sì per i tempi contrarii e per le corantie de aque, come per esser quelle coste senestre da navigar, spazai la mia gondola a Palermo al magnifico consolo nostro per haver più vera inteligentia. Per el ritorno suo, ebbi ditti barzoti non esser de corsari. Ebbi etiam letere dil magnifico provedador misier Domenego Malipiero, qual mi significava dil zonzer suo con 6 galie ivi, et che havia auto hordine da la Signoria, e che atrovandosi con mi et parendoli fosse bisogno, me lasasse qualche galia.