ma talmente reduto che il suo legname mallamente teniva pittura sicome per so armirajo e officiali mei mi è stà referito, judico habi tolto el mar e vento prospero et scorso verso Corfù over Modon, et per star sopra le volte e dimorar verso quelle aque. Levatomi a dì 18, [769] come ho ditto di le aque di Saragosa, justa la comisione ho da star di qui tuto el mexe di lujo, poi transferirme a Modon, tamen mi è stà forzo dimorar fin questo zorno per i respecti intenderai nel processo de questa. Ti aviso come scrivo a la Signoria di le bombarde grosse et di la bontà di questa nave, per contento di maistro Lunardo nostro Brexan. È un navilio miracoloso, maxime di le velle, per haver provato con diversi navilii e barzoti e niun ho trovato mior di questo nel velizar. E sarà gran diferentia da questa a quella conserva hebbi l'altro viazo, et la Signoria nostra ha trovato el vero ordine de li navilii si convien a questi simeli exercicii di le bombarde grosse. Ti aviso, non hè bombarda ni passavolante che sono poste con le sue forchade su per le bande, che non dagi mazor affanno di quello fano le grosse. Et tuto dinoto a la Signoria nostra, et dimando licentia di vegnir a disarmar etc.
     
      Come ho ditto, a dì 18 lujo mi levai di Saragosa, e stando sopra le volte, a dì 20 da matina, atrovandome sora Cao Passera, ebbi viste di 2 velle in mar, una quara, l'altra latina, a le qual, per far il debito di l'oficio mio, mi redrezai a la sua volta. Et quelle, visto el mio atender ad elle, con forzo de velle se messeno a fuzer talmente, che a sol posto se atrovassemo in dromo de Cao Spartivento, largi in mar per mia 70. Et avendomi aproximato a la vella quara a geto de bombarda, mandai la mia gondola per intender la condition sua, et con ordine la dovesse far calar.