Et auto parlamento con quella et fatoli el comandamento, respose esser Antonio de Marcho saragoxano, armato per andar a danni de' infidelli, dicendo non voler callar senza salvo conduto. Et cussì li mandai quello, condizionato, non havendo fato danno a' subditi di la Signoria nostra, che venisse liberamente. El qual, stando con speranza de fuzir, non ostante el salvoconduto, mai volse callar; ma oservando ogni mezo posibile per scampar. Et visto io esserli tanto aprosimato per non haver el modo de fuzir con la barza, sopra venuta la note, cercha a hore una, montò ne la sua barcha con tuti li soi capi e oficiali per n.° 34, et fuziteno via. La qual barza dapoi intromessa, et hauto intelligentia da li homeni restati la vella latina esser uno galion, et per l'ordene dato del preditto Antonio suo capetanio se haveva reduto a la Fontana del Figo pocho distante de l'isola de Manzixi, nel qual luogo me redusi con la predetta barza, dove mandai la mia barcha in hordine a trovar el preditto galion. El qual, habandonato da li soi homeni quelo me conduseno, per la qual prexa vene da [770] mi misier Alvise Palao maistro segreto di Saragoxa mandato con letere de credenza dal signor è presidente de dicto luogo, fato per deliberation dil suo consejo, el qual come ambasador me richiese, per nome de la majestà regia, la restitution di la preditta prexa, scusando ditto corsaro non aver comeso danno a' subditi nostri. E auto longo parlamento sopra de zò, ho fatoli cognoscer ditto barzoto e galion esser stà ben prexi, sì per i dani comessi a' suditi di la Signoria nostra, come per non haver oservato i mandati di la majestà regia, i qual veramente mal sono oservati in dito luogo di Saragosa, e precipue essendo stà danifichà per ditto corsaro Polo de Zuane et Alexio de Grixa nostri bazarioti, ad instantia di qual la Signoria nostra, per triplicate letere, scrisse de li dani perpetrati a dicti poveri per el preditto corsaro, sì al governador et consolo nostro di Saragosa, come a le majestà regie, da le qual essi meschini haveano impetrato la restitution di le robe sue.