Le galie dil trafego, expedite, se levorono da Tripoli a dì 7 dil pasato, et a dì 10 zonseno a Tunis. Sarano expedite di la Barbaria molto per tempo.
     
      Insuper, fui certifichato per el consolo nostro de Saragoxa come el preditto Petro Navaro, al qual esendoli rimasto, dil bruzar li feze le galie di Barbaria, uno bregantin el qual li fo dato per il marchexe di Cotron al presente conte di la Rozela forusito e tiense per Franza, con el qual bregantin prexe el gripo de Ulacho paron, cargo di fave di raxom de misier Nicolò Badoer fo di misier Orso, el qual era con el predito gripo, al prender del qual li fo morto ditto Ulacho. Poi con ditto gripo e bregantin hanno preso la charavela patron Zanetto Fachin, e spogliata de robe e danari quella hanno relasata. Et par, come intendo, dicto corsaro fa residentia a dito locho di la Rozella, dove per el marchexe preditto viene preservato. Siché, atrovandosi ditto a corsaro a quel loco di passo, per quanto si dice, con pensier di far asaissimo male, et essendo io con questa barza non è conforme a questa tal impresa, trovandosi a la justa 2 nostri gripi da Corfù i quali, per comandamento venuti da mi, ho messo in hordine de homeni et artigliarie, con disposition di andar al preditto locho, et non mancharò di far il tutto. Mi doglio haver scrito a la Signoria di haver qualche galia sotil per questi tal bisogni apresso de mi, et non solum ho potuto haverle; ma son stà confinato tre mexi a l'ixolla de Cicilia senza alguna libertà, unde ho perso di conseguir grandissimo honor a la patria et a mi et a caxa nostra etc.