Perhò, terminato di disarmar et rechiederlo a la Signoria per questa invernata; siché non restar di solicitar per esser mal contento. Hor atrovandome con i preditti gripi cargi di formento, tuta via per transferirme a la Rocella et far ogni mezo posibele a la destrucion del preditto corsaro, che Idio mi conziedi la gratia, ti aviso non atrovarmi in nave mexa sì per mi come per le zurme per 10 zorni, per el continuo navegar [773] havemo facto, et esser in Cicilia grandissima carestia. Scrita in nave sora Cao Spartivento, a dì 22 avosto 1497.
     
     
      Copia di una letera di l'antescripto capitano di le nave armade,
      data in nave a la vela fuor del Cavo de le Colone, a dì 28 avosto 1497,
      portata per Vicenzo suo scrivano venuto per terra et zonto in questa terra a dì 15 setembrio,
      per la qual narra il successo ho operato a la Rocela contra quel corsaro.
     
      A dì 22 de l'instante, de Capo Spartivento scrissi etc. E perché non ho posuto haver el pasazo che sperava, me sono rimaste fin hora. Tamen, per quella intenderai ogni successo mio fin quella hora. Per questa, ti dirò il seguito dapoi, et cosse che a ti sarano gratissime et etiam a tutti nostri, maxime a quelli che ne amano. Per le qual, te dissi atrovarme sopra Capo Spartivento con 2 gripi cargi di formento posti in hordine de li mei homeni et artelarie, per andar a la Rocella a destrution del sceleratissimo Petro Navaro corsaro. Et havendo inteligentia el dicto atrovarse a quella marina dove preparava el gripo et brigentin, come per l'altra te dissi, per far el consueto, per la qual inteligentia venuto la sera sopra el predicto loco, deliberai meter li homeni mei in terra, siché avanti zorno havesseno circondata la torre de marina, dove era el reduto del predicto corsaro.