In questo interim, per messo a posta spazailetere al signor Consalvo Ferandes capitano zeneral de la majestà del re de Spagna, che alhora se ritrovava a Rezo per caxon de algune robe se atrovava comprate per questi circunvicini lochi sotoposti al governo suo, et prese per questo corsaro soto de la majestà sua, soto protetione de sue patente. Del qual hebbi bona et amorevel risposta. Le qual mie letere et sua risposta ti mando incluse in questa, le qual mando etiam a la Signoria nostra. Et sopra tuto, non restar de far ogni cossa per far che la letera scrivo a la prefacta Signoria, data a dì 18 lujo [775] et 16 avosto, et questa ultima con le predicte copie, ordinatamente siano lecte in colegio et in pregadi. Per la qual risposta de esso capetanio, poi, per mie letere, ho significato a li dannifichati che se atrovano in Cicilia, et praecipue al nuntio fa in nome de misier Andrea Loredam, che quelli andaseno over mandaseno a trovar esso magnifico capetanio per veder de recuperar el suo, benché de le robe de esso misier Andrea dubito pocho se recupererano, perhoché bona parte erano a la Rozela nei magazeni predicti, et etiam sopra el galion del corsaro, et fondato per lhoro quando forno investiti per le galie de Barbaria. Sa Idio che per mi non se ha manchato far quello se ha posuto; ma veramente dirò: questo che se ha fato, reputo esser stà cosa maravegiosa, come dicono calavresi, in questa nave che reputo uno scoglio sopra el mar. Siché, visto non haver speranza de far più altro, sì per la sason de' tempi, come per non star su la spiaza con questo vaselo, me levai a dì 27 de note per transferirme verso Modon, justa i mandati de la Signoria nostra.