Ancora, fu preso, a requisition di oratori di Treviso, atento che in quella terra era stà fatto il Monte di la Pietà, che zudei fusseno caziati de lì, et più non potesseno star ni prestar usura in Treviso, ma ben per le castelle etc.
     
      Item, fo preso che 'l vescovo di Monopoli, stato per molti mesi in questa terra per caxon che, havendo scrito Alvixe Loredam governador a Monopoli mal di lui, et che era ribello di caxa Aragona et di la Signoria, unde li era stà suspeso l'intrade, or vene quivi a notifichar come volleva esser bon subdito. Et cussì fo preso dovesse ritornar al suo [780] vescoado, godendo le intrade sue, et che havesse quello era in deposito dil passato.
     
      Item, fo preso, atento che la Signoria havea 3 nave grosse di comum a Poveja le qual se inmarzivano, et l'honor di la terra era che fusse fuora nave grosse, et hessendo una chiamata la nave Pandora di botte 3000, la qual haveva abute do carene, era stà ... volte fuora et fata zà anni 8, per esser vechia, che li patroni a l'arsenal al publico incanto la fusse venduta, nuda di coriedi et senza ancore, con questa condition che chi la comprava fusse obligato di farla navegar in termene de uno anno etc. Et cussì, a dì 19 ditto, in Rialto, per Lorenzo Contarini, Piero Moro et Alvixe di Garzoni la fo incantada, et l'have i Pixani dal Banco per ducati 1000, con la conditiom sopra scripta.
     
      In questo zorno, vene in questa terra uno orator dil re di romani molto ferialmente, videlicet era sustituito da uno altro orator doveva esso re mandar, peroché questo haveva do letere di credenza, una dil re, l'altra di quel orator.