Le nove era. Chome el re, da poi roto quelli di Cornovaja e fati morir quei soi 6 principal capi di quelle parte, tuto se aquietò. Di Scozia, che a li zorni passati venisse le zente di quel re a uno loco nominato Dumani ch'è dil re d'Ingiltera, et combatuto, li habitanti si difeseno. Poi, soprazonto el campo dil re di Ingiltera, fugoe li scocesi verso Scocia, et dito campo anglese era ritornato indriedo. Et il re volleva fusse andato avanti. Tamen, si tratava praticha di paxe con dito re di Scocia, et di far noze di esso re di Scocia in una fiola di regal di Spagna, che vegneria ad esser cugnado dil principe noviter maridato etc.
     
      Letera de 17 setembrio, scrita in Londra del [806] dito orator, et zonta quivi a dì 9 octobre. Chome, da novo in quelle bande era come a hora el Perichino, ch'è dito fiol dil re Edoardo, si chiama ducha di Jorch, era in Scocia. El qual è la causa tuta di la guera de' scocesi con englesi. Che inteso la praticha di paxe, chome scrissi di sopra, era partito di Scocia con 2 nave, e venuto a la volta de Cornovaja, et havia iterum sublevato 6 in 8 milia persone, e venuto fra terra mia 60, à lassato la moglie e fioli a uno loco a marina nominato Perin. A l'incontro, el re havia mandato el capitano zamberlam, che fo quello portò vitoria contro Cornovaja, zoè quelli populi. Et etiam havia mandato monsignor de Chent; in tuto zercha persone 12 milia. À fato etiam comandamento a molti capetanii e signori si meta in hordine. Bisognando, sua majestà, vol andar in persona.