Il modo scriverò di soto. Et poco da poi, per letere di Alvise Badoer conte di Cherso et Ossero, se intese la verità. Et il modo fo questo: che volendo venir queste 2 galie separade da li lhoro capetanii, perhoché Francesco Valier capetanio di le galie di Baruto vene di longo et passò Quarner et zonse salvo in Istria, ma a queste 2 galie, hessendo propinqui al ditto Quarner, parse a dicti patroni non voler passar di note, ma tirarse nel porto de Cigala. Et cussì, a hore zercha 21, prima volendo intrar sora la bocha fo vento e la Morexina senza fortuna dete in terra e si rompete, et cussì in quello instante la Guora. Descriver non voglio chome li poveri homini et marchadanti si veteno roti come doveteno star, che credo era cossa molto compassionevele. Tamen, erano propinqui a terra, et la galia Morexina andoe soto aqua cum la prova, et la pope rimase di sopra.
     
      [829] Et Zuam Orio, veniva consier di Candia, con soa moglie et figlioli, ita volente Deo rimase lì sul castello salvo, et il resto di la galia era sotto aqua. Molti si butono in mar per nudar a terra, altri se tenivano a remi e altri legnami, e cussì, a pocho a pocho, quasi tutti scapolono, et molta roba, maxime l'aver sotil, tirono con corde a terra. Altri per remi se tiravano su quelli grepani. Pur si anegoe, tra tutte 2 galie, zercha homini 40, et quatro nostri patricii merchadanti erano su la galia Guora, volendo scapolar, montono su un batello et sopra dil qual multi volse montar, adeo, hessendo troppo cargo, si revoltò e andò a fondi, e tutti si anegoe, videlicet sier Bernardo di Prioli fo di sier Piero procurator stato merchadante grossissimo a Damasco, sier Marco Bolani q. sier Sebastiam ritornava capetanio di Baffo, et dicitur havea in el peto duchati 1500 d'oro vadagnati in quel rezimento, et el suo corpo non fu trovato, ma sì de li altri.