Item, che, de caetero, el padre non possi scriver il fiol a ballota essendo fuora, ma quello debbi presentar a li avogadori di comun, salvo si non fusse in rezimenti.
     
      Item, che a la ballota si scriva compidi anni 20, ita che subito rimasi possi vegnir a consejo senza altra pruova, che prima si scriveva de anni 18 et steva 7 anni in ventura a Santa Barbara.
     
      Item, che non possi esser electo avochato pizolo niun non sia scrito a la ballota, sotto pena etc. in dite parte contegnude.
     
     
      [1497 12 20]Item, a dì 20, fo preso in dito consejo di X con la zonta, et provisto a le pregerie si faceva a quelli di pregadi. Primo, confirmato tutte le altre parte zercha el dar di sacramenti, et che quelli che serano stà pregadi debi non voler quel lhoro li arà parlato. Al presente, voleno che avanti si faci alcuna electione in pregadi over scurtinio in pregadi, et quando si farà scurtinio nel mazor consejo, che prima tutti debino venir a zurar su uno messal sopra el crocefixo, che a quelli li harà parlato o fato parlar di non volerlo: et poi ch'è compito di ballotar, li cai dil consejo di X si reducano in uno loco, et ivi sia tre capelli, videlicet, in una tutti quelli di pregadi e zonta dei qual ne sia tratto 15, in l'altro quelli che intrano in pregadi per diversi officii e sia trato 10, et in l'altro li quaranta criminal, di qual sia trato 10 [838] in tutto. Et cussì a uno a uno chiamando davanti dicti capi, et li debino dar solenne sacramento si son stà pregadi, et trovandone tre che sia stà pregadi, quello fusse romaso dia andar zoso etc. sotto gran pene a chi fosse pregadi et non manifestasse.