Referite in collegio alcune cosse di Pisa etc. Presentò li conti di quello havia speso nel tempo era stato a Pisa, in page de soldati et altri, che sono assaissimi danari etc.
     
      Et fo divulgato, a dì 7, come fiorentini haveano fato tajar con gran numero de guastadori le aque verso Pisa, zoè l'Arno et Stagno, fiumi nominatissimi, per inondar il paese et impedirli la via dil socorso. Tamen, questa nova levono fiorentini de qui; ma non fu vero, né feno alcuna tajata de aque, né altro.
     
      In questi giorni, per l'orator nostro existente a Roma, fo mandato a la Signoria nostra uno libro latino molto degno, el qual havia fatto uno Pozo fiorentino di queste novità francesi in Italia. Et benché fusse fiorentino, convene dir la verità et laudar la Signoria nostra. Et cussì fo mostrato al pregadi, et ordinato per el principe nostro che fosse stampato a eterna memoria.
     
      È da saper, come in questi giorni la Signoria nostra mandoe 2 arsilii a veder de recuperar le merchadantie di le 2 galie nostre rote in porto de Cigala, zoè di la Morexina di Alexandria, perché di la Guora il forzo fo ricuperato; la qual galia era quasi tutta sotto aqua et pocho si vedeva di l'arboro. Et ancora fo mandato la galia sotil venuta a disarmar col proveditor, in tutto homeni 250. El capo, di comandamento di la Signoria et volontà de li merchadanti danizadi, fo mandato Bortolo Contarini de Santo Anzolo. Et è da saper, che la Signoria fece la spexa, con questa tamen conditione che, ricuperandose le merchadantie di la ditta galia, poi quelli de chi sarano le robe debino a rata pagar la spesa.