Et cussì fo provato di alzar la ditta galia, et andoe alcuni inzegneri e gran maestri, li qualli voleano andar sotto aqua et metter alcune corde sotto et quella galia sublevar. Et cussì andono a bon viazo. Quello seguirà, scriverò.
     
      [1498 01 07]A dì 7 ditto, fo posto parte nel mazor consejo per i consieri, di dar a' quatro nostri zentilhomeni anegadi 2 su le galie in porto de Cigala, zoè sier Bernardin Morexini de sier Domenego, et uno fio di sier Bernardino da Molin; item, con la nave di Fiandra Foscara, i quali son nominati di sopra, videlicet uno Memo et uno Donado, per remuneration [852] a' lhoro padri e fratelli quatro ballestrarie per anni 3 subsequenti su le galie de viazi, zoè una per uno. Et anche a sie altri nobili erano su dite galie rote, per haver perso il suo, li fo concesso per 2 anni una ballestraria per uno a l'anno.
     
      Ancora, a sier Zuam Orio et a quatro soi fioli, a dì 8 dito, fo preso parte nel mazor consejo, atento che 'l se ritrovava su dite galie et veniva consier di Crete, et ha abuto gran danno, fu preso di darli per anni 4 a lui e fioli una ballestraria per uno a l'anno su ditte galie de viazi. Siché la signoria nostra è benignissima, e a tutti provede.
     
      [1498 01 08]A dì 8 ditto, gionse a Malamocho uno ambassador secreto dil summo pontefice, el qual era episcopo. Et perché veniva dil cesenaticho dove si moriva di peste, havendo ordine il podestà di Malamocho, era Jacomo Bragadin, da li proveditori sora la sanità che nullo fusse lassato passar senza lhoro saputa, unde, notifichato questa tal venuta per li diti proveditori, fo mandato a star per alcuni zorni a San Nicolò de Lio dai frati.