Tamen, ditto orator publice non si mostroe, né altro di lui se intese.
     
      Fo divulgato, per alcuni avixi abuti, come certe barze francese havia preso una galia di quelle di Villamarin che doveva vegnir a Zenoa. Tamen, non fu vero. Ma è da saper che, zà alcuni mexi, el pontifice tolse a suo soldo ditto Villamarin corsaro con 3 galie, et quelle teniva a la bocha dil Tevere, et li dava fiorini 10 milia a l'anno, e lo doveva mandar a Zenoa quando fo decreto per la liga di mandar ivi armata. Et il re Federigo mandoe ... galie, le qual ancora sono in porto di Zenoa, et la Signoria mandoe Domenego Malipiero proveditor di l'armata con 4 galie, el qual al presente si ritrova a Portovenere, come ho scritto.
     
      [1498 01 11]A dì 11 dito, nel consejo di pregadi, li avogadori di comun, zoè Nicolò Michiel doctor et cavalier, Zuam Francesco Pasqualigo doctor et cavalier, et Andrea Zanchani, menoe li 2 patroni di le galie di Alexandria, zoè Sebastian Contarini fo di sier Julio, et Luca Loredam fo di sier Francesco per disobedientia dil suo capitanio Philippo da cha' Tajapiera, et cussì con lhoro avochati si difeseno. Tandem, fu preso di procieder contra di lhoro, et condanati che i compiano mexi 6 in prexon; pagino ducati 300 per uno, zoè 200 a l'arsenal et 100 a li avogadori di comun; siano privadi di officio e beneficio per anni 4, et per anni 10 di padronaria et soracomitaria, e non s'intenda mai comenzar la prexon se prima non arano pagato tutta la condanaxon. Et cussì fono expediti dicti 2 patroni.