[853] Ancora, è da saper che per la Signoria fo mandato uno avogador a Padoa, el qual fo Andrea Zanchani. Et questo per il caso di Domenego de Martin cognominato di la Camara, per far uno novo processo, per esser smarito il vecchio per il qual alias fo retento et intromesso, per Hironimo Zorzi cavalier olim avvogador di comun. Et cussì, prima fo retenuto dicto Domenego, et a dì 13 ditto, con giazo et grandissimi fredi, dicto avogador gionse a Padoa. Alozò in palazo dil capitanio, era Fantim da cha' da Pexaro, et fece examination de più de 300 testimonii. Intromesse etiam Piero di Santi era ivi per l'arsenal sora le stope e canevi, et Zuam di Martim fratello di dicto Domenego, el qual l'oficio exercitava. Et tra le altre cosse che 'l fece questo avogador a Padoa, fece stropar tutte le porte che di corte dil capitanio ussiva in la terra, acciò sollo per una porta si andasse. Et stato ivi zorni 15, a dì 29 ditto ritornoe in questa terra, et andato in quarantia criminal, leto il processo, prese che ditto Domenego fusse ben retenuto, et che Zuane suo fratello et Piero di Santi fosseno chiamati si dovesseno apresentar a le prexon. Et dicto Domenego fo collegiado, et tochò il collegio a questi: sier Marin Lion et sier Domenego Marin consejeri da basso, sier Vido Morexini cao di XL, el dito sier Andrea Zanchani avogador, et sier Domenego Trum et sier Domenego Querini signori di note. Quello di lui seguirà, fortasse lo scriverò di sotto. Ancora, fo prima ritenuto el capitanio di le prexom dil doxe, perché voleano saper a che modo dito Domenego fue lassato di prexom.