Et scontrono li ditti stratioti a Colle Salveto con la preda di 6000 pecore et molte cavalle. Et il conte Ranuzo di Marzano capitanio de' fiorentini, havendo sentito stratioti esser passati sopra il lhoro paese, se partì de Pontedera con tutte le zente sono a quelle frontiere, et con gran quantità di gente d'arme et di fantarie, et ut dicitur era 100 homeni d'arme, andono per retenir stratioti et tuorli la preda et esser a le man con lhoro. E andava a la volta di Colle Salveto. Et cussì, vedendo che il nostro proveditor et domino Marco da Martinengo et stratioti esser zonti ivi avanti, le zente nimiche non volseno andar più avanti, perché non volevano far fati d'arme con nostri. Et cussì stratioti veneno con la preda a salvamento mediante la scorta, et tuta Pisa have grandissimo piacer. Ancora, veneno le 2 fuste armate per nostri di Pisa, le qual erano stà mandate in corso, et conduseno in Pisa uno bregantino de' fiorentini che preseno in mar, et poi ritornono indriedo sul mar a custodia di la boca di Arno. Et fono mandati a Bibona per levar certo formento che se intese da' stratioti che ivi era senza custodia, da cercha sachi 6000, et havendolo lo conduceseno in Pisa.
     
      [858] Noto. In dita coraria, fo sier Zuam Diedo e sier Zanetto Gradenigo q. sier Justo.
     
      Noto. Se intese il principe di Salerno doveva venir a Trani loco nostro, con 50 homini d'arme, 50 cavali lizieri et 200 provisionati e alcune jumente, le qual poi le donò a la Signoria.
     
      Anchora, se intese come a Liburno era venuto et zonto con uno navilio di Provenza uno ambassador dil re di Franza mandato dal re a Fiorenza, chiamato monsignor di Zumella.