Et il zorno sequente i serenissimi re mandono a levar di caxa dicto nostro orator da molti soi, et deteli audientia. Et che la sera avanti, el marchexe de Villafrancha fiol dil conte di Bonivento, uno di principal signori di quella corte, volendo tuor uno suo falcon che era fuzito, caschò di uno pozuol et de fato morite. Et è da saper, chome Jacomo Contarini dotor et cavalier orator nostro ivi in Spagna, recevete la licentia sua che zonto fusse el prefato ambasador Domenego Trivixam ivi dovesse tuor [866] licentia da quelle majestà, et dovesse ritornar. Et cussì verà.
     
      [1498 02 09]A dì 9 fevrer, fo preso in quarantia per il piedar di sier Andrea Zanchani avogador, di retenir Fabiam di Fabiani citadin di Padoa scuode le daje per la comunità. Unde per questo, veneno 4 oratori di Padoa, videlicet domino Francesco Doto el cavalier, domino Michiel da Melazo, domino Raphael di Relogio, et domino Jacomo da Liom. Et a dì 10 et 13, ebeno audientia in colegio in contraditorio col prefato avogador, et fo comessa per la Signoria la cossa ai cai di X.
     
      Item, Domenego di Martim, era sorastante a la camera di lavorieri a Padoa, preso di retenir per sier Andrea Zanchani avogador qual andò fino a Padoa per questo a formar processo, et fo qui a la corda colegiado. Etiam, fu retenuto Zuane so fradelo et Piero di Santi, li qual do si presentono.
     
     
      Questi fono li capitoli di la tregua fata tra il re di Franza et li regali di Spagna,
      di spagniol in italiano translatadi.
     
      Seguita li articoli facti e concordadi intra el molto alto e molto poderoso principe don Fernando e dona Isabela, per la gracia de Dio, re e raina de Castiglia, de Lion, de Aragon, de Sicilia, de Granada etc. de una parte, et don Guillen de Poyteres signor de Clarius, et Ruberto de Baternay segnor de Bonscage e Zuam Garin e Michiel di Agramonte e maistro Stevano Petit secretario, ambasadori e procuradori del molto alto e molto poderoso principe don Carlo, per la gracia de Dio, re di Franza, in soo nome, e per virtù del suo poder e procuration bastante che para ello tenia, che serà de giuso inserta de l'altra parte.