Che da poi el dì che la ditta notifichation sarà fatta, da lì indriedo la ditta tregua et abstinentia de guerra dura doy mesi, comenzando a contar dal dì de la ditta notifichation inanti. E compido li dicti doy mesi, la dita tregua sia compida e aspirada e non dura più.
     
      Item, è acordado e asentado, che 'l ditto re di Franza e li ditti re et raina di Spagna farà publicar e cridar la ditta tregua e abstinentia de guerra, cadauno in le sue frontiere et porti de mar, lo più presto che far se porà.
     
      Per tanto, nui, li ditti re et reina di Spagna, prometeno in nostra bona fé et parola real, e juramo sopra la Croce dil nostro Signor Jesu Christo e a li quatro evangelii santi con nostra mano corporalmente tochando, che tegniremo e guardaremo e compliremo, e tenir e guardar e complir faremo tutte le cose sopraditte contenute in la presente capitolation e cadauna de quelle, segondo la forma e tenor de quelle, e che contra di quelle, ni contra alguna di esse, non vegniremo per nisuna causa ni raxon, direte vel indirete.
     
      E nui, li ditti don Guillen de Puyteres signor de Clarius, e Ruberto de Baternay signor de Bouscage, e Gioam Garin, e Michiel de Agramonte e Stevano Petit, ambasadori e procuradori de lo dito re di Franza, per virtù dil dito poder e procuration che tenemo in suo nome, promettemo e juremo in anima de sua majestà, sora la Croxe del nostro Signor Jesù Christo e li quatro sancti evangelii con le nostre mano corporalmente tochadi, che el ditto re di Franza nostro sopran signor tegnirà e guarderà, e terrà e guarderà e complirà e farà tutte le cosse sopraditte contenude in la presente capitulacion e cadauna de quelle, segondo la forma e tenor d'esse, [868] e che contra di quelle, ni de nisuna d'esse non verà per niuna causa ni rason, direte vel indirete.