Item, lettere di primo fevrer, di Zuam Paulo Gradenigo et etiam Zustignam Morexini, come erano fornite le mostre et davano la paga a le zente nostre, et si havia fatto la compagnia di 200 provisionati soto Gorlino, et che era zonto etiam tre altri contestabili nostri per far le lhoro compagnie, zoè Paulo Basilio, Hironimo Barisello, et Martinel di Lucha. Et che attendevano a distribuir il formento tra quelli poveri cittadini, praecipue a li più calamitosi e poveri, cargi di fameja e perse e occupate le lhoro possessione de le coline, che non hanno altra industria di viver salvo le possession. Et haveano electi 6 citadini pisani che cognoscano il bisogno di li citadini, et cussì con questi dispensatori se distribuivano dove era il mazor bisogno. Etiam si partecipava con le castella di fuora, zoè Cassina, Vicopisano, che sono lochi a le frontiere de' inimici che portano il cargo di la guerra.
     
      Item, chome avendo mandato essi proveditori, in executione di le lettere di la Signoria nostra, uno nostro contestabele era lì in Pisa con ... fanti et alcuni danari in peto, zercha ducati 150, chiamato Alvixe Tealdini in Lunesana a dar socorso a li marchesi Malaspina che erano danizati da' fiorentini, et per metter vittuarie in li lhoro castelli, et che haveano aviso ditto nostro contestabele da' inimici scosi in arguato era stato preso, et cussì fue conduto presone a Fiorenza.
     
      È da saper, chome el ducha di Ferara se interponeva in voler adatar la cossa di Pisa con la Signoria nostra et fiorentini, sicome ho scripto di sopra, et continue andavano lettere su in zoso, et esso ducha scrivea a la Signoria, et suo fiol don Ferante era pur anchora in questa terra; ma non andava molto fuor di caxa, et aspectava haver danari di la sua conduta.