Et questa have ballote 12. Poi li consejeri messeno che 'l fusse bandizà dil padoan e di Padoa; condanato a pagar il mal tolto e la mità più per pena, et questa have ballote 56. Et sier Piero Bondimier et sier Vido Morexini cai di 40, messeno questa parte che 'l fusse confinà a Cherso et Ossero in vita soa; che 'l sia condanà a restituir ut supra et a la Signoria, et a quelli à tolto indebitamente, come se liquiderà per li avogadori, e la mità più per pena, e non esca di prexon fino non abbi satisfato tutti, et che 'l sia publicato ogni anno la prima domenega de Quaresema, justa il solito, per uno di avogadori nel mazor consejo, et si 'l romperà il bando, pagi l. 1000 et stagi in prexon etc. Et questa have ballote 64, et non sincere 6. Or queste do parte andò, quella di consieri et queste di cai di 40. La prima have ballote 53 et questa 81. Et fu presa, et expedita, et la matina fo publicata ditta condanason su le scale di Rialto.
     
      [1498 03 11]A dì 11, vene lettere di Cigala di sier Bortolo Contarini. Come la galia si recuperava, che era uno miracolo, et el capitolo di la lettera qui sotto sarà scripta, la qual comenza cussì, et è data a dì 8 marzo: "Dinoto come spiero ozi trazer fuor di la galia colli forsi 20, per principiar a liberar la prova per poderla mejo tirar in picol fondi. Benché, a dì 6 di note venendo 7, ne crepasse do brage a prova, nondimeno, con lo ajuto de Dio, ne tirasimo subito una altro a prova, siché ne havemo tre a puppa et do a prova et potemo meterne di le altre bisognandone.