Et questo feno acciò li marcelli et mocenigi non andasseno fuora di la terra, et questi de lì corerano per s. 5 l'uno chome fa li maidini. Et cussì fo facti li dicti grossi, acciò con le galie potesseno andar, et come sarà facti, quello sarà suso scrito noterò.
     
      [904][1498 03 12]
      A dì 12 ditto, vene lettere dil ducha di Ferara al suo Zuam Alberto da la Pigna che feva in questa terra li fati soi, data a dì 8. Come era ivi venuto domino Baptistino de Campofregoso foraussito di Zenoa et stato fino hora con Franza in Aste. Et era venuto secondo la convention fata col ducha de Milano, videlicet li ha restituito Novi et li dà certa provisione, come ho scripto di sopra, el qual conferite con esso ducha di Ferara, et dicea chome il re omnino atendea a l'impresa de Italia. Tamen, credeva questo anno il re non fusse per vegnir in persona; ma manderia monsignor di Obignì a Liborno, et farà altre provisione. Et cussì ordinoe queste cosse dovesse dir a la Signoria.
     
      È da saper, che la praticha menava dicto ducha con fiorentini andoe in fumo. Tuttavia, ivi stava il suo oratore.
     
      Item, questo ducha mandoe a dimandar a la Signoria per il prefato Zuam Alberto, in nome di suo fiol don Ferante, certi capitoli: inter caetera, quante page haveria a l'anno. Et li fo risposto non se li poteva dir, et fo expedito senza dir altro.
     
      Item, l'orator suo era in questa terra domino Aldromandino di Guidoni, stato longamente con licentia dil suo signor, si preparava di andar in pelegrinazo in Jerusalem. Et esso ducha di Ferara, in questi giorni, fue amalato et stete molto mal.