Dicese esser stato l'armirajo grando che i à fatto ussir, perché vol veder di pacifichar le cosse. Non se pol intender la verità, perché tutto quello fano, fano con arte. Mostra voler far per un modo, et è per l'altro. Aspetavano qualche nova da Damasco, zoè di campo, che poi tegno farano qualche deliberation. Pur resona che Cansum Camsomie è vivo, et che aspeta el tempo. Non so quello dobiamo creder, non essendo venuto fuora fin hora. Staremo a veder etc. In Alexandria, a dì 30 decembrio 1497.
     
     
      [916]Seguita altre nuove.
     
      Noto, chome a dì 22 marzo, fo gran consejo et seguite tre cosse. La prima: tutti tre li cai di 40 toccono la voxe di avochati fiscali, zoè, Polo Ferro, Vetor Foscari et Vido Morexini, et etiam l'altro consejo a tutti tre tochò dicti avochati, li quali fono electi li primi di la terra et vechii advochati.
     
      Item, fo electi do zeneri di Cosma Pasqualigo capitanei di galie, uno a Baruto et l'altro in Alexandria et Crete.
     
      Item, per esser il terzo consejo, la quarantia novissima si ridusse in uno caxo di sier Piero Moro et fratelli q. sier Zuane contra alcuni villani da Castelfranco, auditor sier Alvise Gradenigo. Et la matina et la sera, da poi consejo, se reduxeno a espedir, et fo fata bona.
     
     
      Sumario d'una lettera di sier Andrea Griti q. sier Francesco,
      scritta in Pera a dì 17 zener 1497 (m. v.),
      drizata a sier Andrea Cabriel ducha di Crete.
      Ricevuta in Candia a dì 2 marzo 1498.
     
      Questo ladro di Carachassam se atrova in queste acque, con una caravela, uno schierazo grosso et tre fuste benissimo in hordine.