Et cussì li fo a Sonzin donato la militia, et centoli li spironi, et altre solenità celebrate per Zaccaria Contarini cavalier et Marco Dandolo doctor et cavalier, i qualli etiam con le trombe lo accompagnono fino a caxa etc.
     
      In questo zorno, fo consejo di X con la zonta, et etiam il sabato fu. Et la sera, a hore zercha 3 1/2 di notte, acadete quello scriverò. Il marti da matina, a dì 27 marzo, andando io, justa il solito, a San Marco, tutti diceva: "Questa note è stà fato justicia." Et cussì, andato su la piazza, in mezo di le 2 colone era apichato Antonio di Landi secretario nostro, d'età di anni zercha 70, et quello teniva i [918] secreti, trazeva le zifre et andava in pregadi. Tutta la terra miravegliata, perché non si sapeva nulla, et era apichato in manege a comedo et di nocte. Et è da saper, che fo per haver revelato i secreti con uno Zuam Battista Trivixam che olim, era a la canzelaria, ma fu casso, et era quasi secretario dil marchese di Mantoa. El modo fo discoverto, fo che questo Antonio di Landi, licet vechio fusse, et havia ducati 180 a l'anno da la Signoria nostra, teniva una femina chiamata Laura Troylo, stava a Santa Trinità, et questo Zuam Battista ancora vi pratichava, et la sera parlavano latino tra lhoro. Questa Laura si disse ad uno altro suo amico chiamato Hironimo Amai popular nostro, el qual si scose drio il leto, et udite questi do ragionar di stato et di segreti di pregadi. Et ditta Laura non li bastò l'animo andarli ad accusar; ma mandò questo Hironimo.