È da saper, come, al principio di questo mexe, si mutoe quasi la mità dil colegio. Intrò consejeri sier Marin Lion et sier Domenego Marin; cai di 40 sier Alvise Belegno, sier Piero Foscolo et sier Ferigo Loredam; savii dil consejo sier Antonio Grimani procurator, sier Constantin di Prioli et sier Filippo Trum procurator; savii a terra ferma sier Lunardo Grimani, sier Hironimo Lion el cavalier, sier Piero Duodo; savio ai ordeni sier Zuam Dolfin de sier Nicolò, et io, al primo di questo mexe, entrai signor di notte.
     
      [1498 04 04]A dì 4 ditto, per lettere di Pisa. Se intese come fiorentini se ingrossavano molto, et pareva volesseno meter campo fuori, et li Viteleschi venivano in lhoro ajuto.
     
      Item, chome pisani imploravano ajuto, pregando non fusseno abandonati. Et chome per una lettera di 30 marzo, vidi che in questo zorno le nostre zente di Cassina scaramuzoe con li inimici de Pontadera, et per nostri fu preso 6 ballestrieri feriti, et de li nostri fu morto uno solo stratioto.
     
      Item, come in quel zorno, Zustignam Morexini et Zuam Paulo Gradenigo erano chavalchati a la Foce a le galie nostre dil proveditor Malipiero, era tornato di Zenoa, per conferir alcune cosse insieme.
     
      Item, chome in quel medemo zorno in Pisa era stà facta una solenne procession per tutta la terra, con tutta la chieresia, scole, la signoria di Pisa et tuto il popolo pisano masculino et feminino. Et fu fata per causa che nel senato nostro si tratava la materia di Pisa, et perhò invocavano l'auxilio divino a inspirar a' nostri che no li abandonaseno, imo facesseno star constanti.