Et che il re disse: "Lassa la Signoria che le mie nave possi levar vini di Candia se leverò questo?" Et che 'l rispose: "La Signoria non ha fato l'edito per la majestà vostra, ma per il pericolo di corsari che veniva a cargar etc." Or che il re disse: "Orator, sarò con el mio consejo, et ti risponderemo. Et avanti che tu vadi via, parleremo insieme." Quello sarà, scriverò.
     
      In questi giorni, maistro Nobele francese, bombardier, stato in prexon molti mexi, hessendo fuzito di prexon per avanti insieme con quelli rompete, andoe a Ferara, poi si vene presentar. Li fo fatto salvo conduto et lassato andar per la terra. Or vedendo nostri non lo remeteva perché havia duc. 25 al mese da la camera di Brexa, si partì di questa terra insalutato, et andoe a Fiorenza.
     
      Et nel consejo di X fo processo contra sier Antonio Baffo et sier Bernardin Pollani fono consejeri a la Cania, i qualli, per le cosse seguide contro sier Antonio Zantani ivi mandato per vice rettor per il rezimento di Candia, et posto la terra in doe parte, et fo mandato per loro, al presente fono expediti. Che compieno uno anno in prexon privati di ogni officio et beneficio di l'isola di Creta per anni 10, et che dita condanasom sia publichata in Candia et a la Cania. Et cussì fono expediti questi do stati ivi consejeri nostri.
     
      [1498 04 12]A dì 12 avril, el zuoba santo, el vescovo ambasador del ducha de Milan disse messa a San Zorzi Mazor, et si comunicoe insieme con tutta la sua fameglia, et poi che have chomunicato, dicto certe oratione, disse: "Pregate Idio per mi, et che metta pace in Italia et la liberi questo anno di guerra.