Poi, da Turino, da misier Mafeo Pirolano residente a Turino per nome de la excelentia del nostro ducha, supragionse uno cavalaro che avisava come a hore 3 di notte passava uno [939] cavalaro de Monferato, el qual fece capo al grande tesorero, et feceli intendere che a li 7 de ... a hore 2 de note era morto el prefato re. Poi per qui è pasato uno cavalaro fiorentino. Ha fato capo a l'oratore suo è qui, et àli ditto a bocha, perché lui non haveva lettere directive, pure il prefato re a dì 7 a hore 2 esser morto. Da poi, essendo la excellentia del ducha a tavola a hora del disnar, uno cavalaro con lettere de man proprie del signor Constantino avisava che, a li 7 a hore 2 de notte, haveva hauto aviso per cavalar a posta el prefato re de morte subitana esser morto in Ambosa.
      Mediolani, 12 aprilis 1498.
     
      Un'altra lettera di Milan.
     
      Per le mie di 12, si haverà inteso di la morte dil re de Franza. Hora, per questa mia, occore significhar che ozi, da poi disnar, subito gionse uno cavalaro con lettere del signor Constantino, per le quale scrive più particularmente de tale cosa, in significare che 'l sabato, a' 7 di questo, el prefato re disnò di bona voglia, et che dapoi, li sopragionse quelo suo male caduco gli è solito a venire, et stete cussì insino a le hore 4. Et poi perse la favella, e spirò. Poi, a le 9 fu creato re de Franza el ducha d'Orliens, in a Bles loco del prefato ducha.
     
      Mediolani 14° aprilis 1498.
     
     
      Seguita altre nuove.
     
      [1498 04 15]A dì 15 april, fo el zorno di Pasqua, dapoi tornato el principe nostro da San Zacharia dove andoe con le cerimonie e tutti li oratori, excepto perhò Mantoa, licet vi fusse uno in questa terra domino Beneto Tosabecho, tamen, mai el principe non lo mandava a chiamar etc. or hessendo per tuor licentia in palazo el principe, se li butò davanti Marco Antonio Sabelico, et li presentò uno libro latino ch'è la historia da principio mundi sino a la declination de l'imperio, chiamata Eneade, partita in libri 9, opera molto degna, la qual la intitoloe a esso serenissimo principe nostro, et butata a stampa, di valuta et precio posto ducati tre l'una.