[1498 04 20]A dì 20 april, nel consejo di pregadi, hessendo fato segurtà sul mar di Franza e Bertagna per la morte di re Carlo di Franza, da poi molte disputatione, fo preso parte di mandar questo anno 4 galie al viazo di Fiandra, di le nuove, di le mesure grosse, con don di ducati 5000 per galia a li patroni che le torano, videlicet ducati 4000 di 3 per cento, et ducati 1000 di accrescimenti si scuode a li governadori di le intrade. Di le qual 4 galie, 3 vano a le Schuse dove deno star zorni 50, poi vano a Zentusi over Antona dove deno star zorni 60. A Chades dieno compir 10 cori di 60 conzi per galia da meter su le porte avanti che intrano nel parizo di [944] Bertagna, e deno meter el copano in zardin sul fango e la barcha a meza galia; con li capitoli zà messi et presi nel meter dite altre galie di ditto viazo. Et a dì 21, in Rialto, justa il solito, fono incantate. La prima have sier Fantin Querini q. sier Anzolo per sier Anzolo Malipiero q. sier Tomaso per l. 50. La seconda sier Hironimo Basadona q. sier Filipo con sier Cristofal Soranzo q. sier Beneto per ... 70. La terza sier Alvise Minoto de sier Andrea con sier Vector Pixani q. sier Marin, per ducati uno. La quarta sier Piero Bragadin, fo patron in Fiandra, per lui sollo, per ducati uno. Et cussì incantate dicte galie, a dì 22, nel mazor consejo fo facto electione di capitanio. Non passò niuno, et el zorno seguente poi fo electo sier Luca Querini fo capitanio et proveditor a Napoli di Romania et di pregadi, el qual subito aceptoe.