Et dicto corpo vuol portarlo a Milan, et ha obtenuto di haverlo dal re di romani e da l'episcopo di Trento. Era con lui domino Davit, olim orator dil dito signor in questa terra.
     
      Item, come don Alfonxo fiol primogenito del ducha di Ferara, el qual era amalato a Ferara, si tratava di maritarsi in la duchessa Ysabella fo moglie dil ducha di Milano morto, et fia dil re Alfonxo. Quello seguirà, ne farò mentione; ma non est credendum.
     
      Item, esser per avanti passato de lì uno Rustichelo visentin per venir a Veniexia per nome di Zuam Jacomo di Triulzi, per scusarsi con la Signoria nostra non poter con quella acordarsi, per esser fato huomo dil re di Franza.
     
      Item, come el ducha di Milan havia fato spegazar di muri di Milan e per tutte sue terre dicto Zuam Jacomo, el qual era dipento per uno pe' come traditor.
     
      Item, che a Milan si feva continuamente pruove di giostrar, perché el ducha volea far una degna et magnificha giostra el giorno di la Sensa con precio.
     
      [963] Per lettere di Cristofolo Moro podestà et capitanio a Ravena. Si have come, a dì 13, el reverendissimo cardinal Grimani gionse ivi honorato assai. Alozò in palazo, et Jacomazo da Veniexia et Meleagro da Forlì condutieri nostri li andono contra con le sue zente, et per Ravena erano coperte le strade di zenevre etc. Et questo cardinal partì a dì 15, andò verso Lugo e Bagnacavalo per Ferara.
     
      In questo mezo, fo pratichado di acordar a nostro stipendio Zuam Jacomo di Triulzi, el qual era in Aste, et li fo mandato Zuam Piero Stella secretario nostro, avanti andasse in Franza, a parlarli.