El qual rispose esser sempre deditissimo a questo illustrissimo stato, ma che havea promesso la fede al re nuovo, dil qual era molto amico, et che la Signoria credesse che l'era forsi per zovar più stando di là che venendo di qua. Conclusive, non si potè haver, per largo partido li fosse stà facto. Et se 'l fosse venuto, el ducha di Milan haria auto una pessima nova, et di ditto Zuam Jacomo ha grande paura.
     
      Ancora, el ducha de Milan tramò un'altra cossa, che fu di acordar el marchese di Mantova a suo stipendio. Et non osava farlo; ma lo fece soto una ombra di esser capitanio di Maximiano in Italia, et di questa tal conduta per questa terra si parlava.
     
      [1498 05 17]A dì 17 mazo, nel consejo di pregadi, vedendo el re di romani non mostrarsi molto amico di la Signoria nostra, et che l'andava verso Borgogna volendo far diete, et instigato dal ducha de Milan non feva molto caso di l'ambasata nostra et poco consultava con Zorzi Pixani doctor et cavalier orator nostro, unde, fo decreto di suspender l'andata di Sebastian Zustignam era electo orator a sua majestà pro nunc, fino non segua altro.
     
      Et etiam, in dicto consejo, fo facto la comission a li synici de mar Piero Sanudo et Luca Trum i quali, recto tramite, andasseno a Corfù, poi a Candia et Cypri, et di qua dil colfo non avesseno a impazarsi, perché opiniom era et la parte presa di elezerne doy altri, et a questi li fo tolto per Lunardo Grimani, come savio a terraferma che messe la parte, certe sue utilità, et fu presa dicta parte. Tamen, tutti uno ore dicevano li era stà facto gran torto a questi do; ma per aver aceptato una volta, abuto li danari, terminono andar con uno gripo a Corfù, perloché le galie sotil non andavano via cussì impressa.