Item, che il scrivan dil capitano Francesco Marioni era stà amazato; tajà uno brazo a uno fiol dil capitanio Contarini, et ferito Filippo Trivixam patron etc. Et come Vetor di Garzoni era stato su dicte galie patron, era partito per ritornar per terra, et zonse a dì ... zugno in questa terra. Et per lettere di li jurati di Valenza, la Signoria nostra fo certifichata come, a dì 4 fino a dì 7 di questo, le galie nostre di Barbaria, hessendo ivi in spiaza, vene 12 barze di Franza, et comenzò a combater dicte galie, et durono tre zorni. Ma le galie si difeseno virilmente, et se tirono più in terra che fu possibile, incatenate l'una con l'altra, et le nave non poteva venirli apresso. Et che, fino a dì 7, nostri si difendeano, et che la terra deva gran socorso a le galie di bombarde piantate, acciò le nave non si acostasse, et altre bone provisioni. Et per una lettera di Sebastian Marcelo q. sier Antonio scritta in questa terra, si intende molte particolarità, la qual lettera in sumario sarà qui soto anotada.
     
      [971]Copia di una lettera di Sebastiano Marcelo q. domini Antonii
      scritta a sier Andrea e Zuam Dolfin q. sier Daniel, data a dì 21 mazo sopra Portovenere.
     
      [1498 05 06]A dì 6 dil presente, partiti di Jeviza per andar a la spiaza di Valenza. Et a dì 7, la matina, ritrovandose nui in bonaza, el consolo nostro de Jeviza vene con uno bregantino in dicto loco, che cercha era mia 20 lontano di Jeviza, e portò lettere de li jurati di Valenza fate a dì 5 dil presente, le qual advisava el governador de Jeviza, come a dì 4 dil presente, gionse barze 12 francese sopra la spiaza, le qual combatevano le galie nostre di Barbaria.