Pregovi che subito me dati recapito a le incluse, facendo intender a li nostri amici, qualiter nui habiamo fato da seno e non da scherzo. Son stato in marema con 600 cavali. Ho fato un botino de circha 1200 capi de animali grossi. A la tornata, me atachai con lo conte Ranuzo, qual me aspetava a la strada con sue zente d'arme, balestrieri et fanti etc. Scaramuzamo fin a mezo di domenica; fin a tanto zonto questo magnifico proveditor, con lo governator, con zente d'arme, balestrieri et provisionati etc. deti dentro et rompemoli et fracassamoli. Sono presi li infrascriti, lo conte Lamberto di Marzano, Zan de la Vechia, Achile da Cesena, Bandin da la Pieve, lo capitan Guerrier franzoso, con cercha 70 homeni d'arme, morti da 100 provisionati franzosi et lo resto presi et mal menati. Lo conte Ranuzo et Chiriaco dal Borgo scampò a fatica nel revelino del castello etc. et nui con la victoria et botino se ne tornamo a Pisa. Idio laudato ad honore de la nostra illustrissima Signoria.
      Pisis, die 21 maii 1498.
      JACOBUS SAVORGNANUS, armorum capitaneus.
     
     
      Sumario di lettere di Zuam de Tabia consolo nostro in Syo de 5 april,
      drizade a domino Piero Dolfin q. misier Zorzi.
     
      Da novo habiamo, el Turco ha quasi desmesso far lavorar i suo' vasi per far armada grossa, cussì come havea dato principio del mexe de zenaro. Vero hè che ancora se va lavorando fredamente. Tamen, se divulga andarà fuora de streto vele 25 in 26, zoè galie 6, fuste 12, parandarie con bombarde grosse 4, barze 4, sotto capitaniato de Camalì corsaro, lo qual à dato ad intender al Signor voler andar a Malta et a l'isola de Cicilia.