Item, che nostri da poi la victoria non haveano facto nulla, li manchava polvere etc.
     
      Item, che il conte Lamberto di Marzano, al qual il conte Ranuzo li havia dato l'aviso di sopra et mandato la copia di la lettera de' fiorentini, era impresonato et malcontento, et misier Zuane de la Vechia contestabele di 200 fanti, Guerriero capitano di provisionati 100 franzosi, misier Achiles da Cesena homeni famosi, erano pur tenuti soto grande custodia, et che erano molto pisani solicitati a lassarli et il proveditor nostro etc.
     
      El marchese da Mantoa era zonto a Milano incognito. El ducha disse al nostro orator: "L'è venuto qui el marchese di Mantoa. Vederò quello el vorà." Che 'l ducha havia fato un consulto con li oratori di la liga et il nostro et Jacomo Contarini veniva di Spagna, et molto largamente havia dicto l'opinione sua non esser in voler nostri domina Pisa, et più presto cha perder il stato, chiameria il Turco.
     
     
      [1498 06 04]A dì 4, fo decreto et astreto li oratori in Franza electi, a mezo el mexe presente dovesseno esser [982] partiti, sotto pena etc., che nostri desiderava molto fosseno zà in camino.
     
      A dì ditto, fo preso parte el signor Antonio Maria di Ordelaphi olim signor di Forlì, el qual havea da la Signoria nostra in questa terra a l'officio ... ducati ... al mexe di provisione, vedendo madama di Forlì cerchava novità et dar ajuto a' fiorentini, che dicto signor dovesse andar a Ravena, acciò bisognando, fusse posto in la signoria di Forlì, come lui a chi de jure quel dominio aspeta.