Mostrò di dar licentia a Lucio Malvezo acciò andasse a conzarsi con fiorentini, et anche li mandava danari, et per ogni via li volleva ajutar, et questi 2000 sguizari di zorno in zorno si aspectava.
     
      Questo è il sumario di una lettera de Pisa, che nara il modo seguito a dì 7 di questo. Come [992] l'exercito nostro cavalcò di Cassina a campo a Ponte di Sacho, et con passavolanti et curtale, et per esser atorno dicto loco non muri ma repari fortissimi da terra, non se li fece gran danno. Et speravasse prenderlo il dì seguente; ma soprazonse la note le spie al proveditor, che li notifichò come Paulo Vitelli et Vitelozo veniva in gran furia da Fiorenza con gran zente per asaltar l'exercito nostro, et che doveva zonzer la matina a Pontadera, come in effecto zonse, et che conducea con secho homeni d'arme 170, balestieri a cavallo 200, schiopetieri a cavallo 40, provisionati 1500. Unde, intesa tal nuova per nostri, parse a li mazori nostri, per segurtà de l'exercito, redurse in loco securo, et habandonar la impresa. Et cussì fato, la matina, che fo a dì 8, il campo si levò et ritornò a Cassina ordinate, con le artigliarie avanti. Et dito exercito nostro è a Cassina. Li inimici, si dice, danno danari assai, et che a li homeni d'arme danno ducati 60 de imprestanza, et 4 canna de veluto da vestirsi, et che se ingrossano de zorno in zorno per far qualche ponta se potrano.
     
      Item, come par che Zuam Gradenigo condutier nostro a dì 10 havia fato parole con Thomà Zen proveditor per li soi danari, et che 'l fu su quella di levarse et andar con Dio etc.