Pur tutto el Friul dice è feudo nostro, et in Goricia si ritrova uno tedesco capitanio chiamato domino Virgilio, ch'è tutto amico di la Signoria nostra. Or venuto tal nova, fo chiamato li cai di X, et consultato in collegio; et cussì questa materia nel consejo ditto tramono, et fu in questo zorno da poi consejo che fo fato luogotenente in ditta Patria di Friul Domenego Polani fo savio dil consejo, consejo di X con la zonta. Steteno pocho, et vene zoso. Erano capi dil consejo di X, Troylo Malipiero, Marco Antonio Morexini cavalier et Bortolo Vitturi. Et da dapoi, el zorno seguente; vene lettere che non fu vero di la morte, ma ben era amalato et steva malissimo. Quel seguirà, noterò.
     
     
      [1498 06 25]A dì 25 ditto, fo San Marco et pregadi. Fatto la comissione a li oratori nostri che andavano in Franza, i qualli zà erano zonti a Verona, videlicet quello haveano a dir al ducha de Milan, marchese di Monferà, cardinal San Piero in Vincula, Zuam Jacomo di Triulzi nomine dominii di la sua andata in Franza. El qual ducha se ritrovava a Cremona. Alcuni diceva torneria a Milano per esser con dicti oratori nostri, et altri diceva anderia a Mantoa. Tamen, il ducha di Ferara che vi doveva andar, par non vagi al presente, et Marco Lipomano orator nostro era rimasto a Milano et fo laudato dal senato.
     
      Item, fo preso, atento che li patroni di le galie di Fiandra, perché non li era stà ateso, chome diceano, a la promessa dil don, perché voleano avanti trato et la Signoria voleva darli da poi ritornati del viazo, or pareva non volesseno andar, et fu preso che dicti patroni, in termene ut supra, chome ho scripto, et perché le fo incantade e non trovono patroni; fu preso a dì 26 di tuorle da dosso di dicti patroni, et incantarle et meterle solum per Antona e non per Fiandra, con don di ducati 4000 per galia, [1000] che prima erano 5000 di danari, 1000 ducati di acressimenti e 'l resto di li 6 grossi etc.