Et cussì, a dì 27, fono incantade et non trovono iterum patroni. Unde, el primo pregadi, si farà provisione zercha questo.
     
      Vene in questa terra el conte Zorzi Zernovich, steva a Ravena, per alcune cosse di la sua conduta. Fue a la Signoria, et poi ritornoe a Ravena a le stantie a lui deputate.
     
      [1498 06 26]A dì 26, vene lettere di Domenego Malipiero proveditor di l'armada, date a dì 20 a Portofin, et era per vegnir verso Pisa. Narra chome, partito che 'l fu con le 4 galie per andar a Valenza in socorso di le galie di Barbaria, zonto in Provenza verso Niza e Villafrancha, dove par siano stati ben veduti licet siano francesi, et prima in alto mar trovoe una nave savogina, la qual, hessendo a la vella, fece callar et la sfondrò con le bombarde, et callata, cognosuta era savogina amici nostri, dice la causa esser stata sua, perché si havesse callato nulla seguiva. Or perché ditta nave era sfrondata a la banda et riconzata alquanto, le galie la remurchiò in Villafrancha, unde da quel governador fo ben visto. Tamen, non volse dismontar né far pratichar, et ivi intese per la ditta nave che partiva di Jeviza, come era avisi di 2 da Valenza che le nostre galie di Barbaria in quel zorno erano partite di Valenza scapolate da l'armata franzese, et andate a Denia; et haveano tolto una nave savogina in soccorso et conserva dandoli ducati 500 al mese, et altri navilii. Siché andavano al suo viazo, et erano cussì liberate. Et questo advisava certissimo, unde parse al proveditor di non andar più longo e ritornar a Pixa, et cussì era zonto a Portofin, et navicheria a Portovenere.