Demum, che si soa majestà li diceva di far lianza o liga etc., dovesseno laudar il bon voler di sua majestà, et subito rescriver, perché li rescriveriano il voler nostro.
     
      Ancora fu preso di far le mostre zeneral di le zente nostre d'arme, et darli le do page, chome fo [1013] ditto, et farli a dì ... di questo in tre luogi, a Verona, a Brexa, et a Sazil in Friul.
     
      In questi giorni, nel consejo di pregadi, fo conduto el principe di Salerno con provisione di darli ducati ... al mese. Et li fo dato ducati 2000 acciò tenisse li cavalli havea fino etc. Et col ducha di Urbino la praticha si teniva et si pratichava.
     
      Et è da saper, chome a dì ... di l'instante, fo electo nel mazor consejo consier di Veniexia dil sestier di Castello Piero Donado, fo podestà a Brexa, da santa Maria Formosa, et avelo da Marco Antonio Morexini cavalier fo capitano a Padoa, di ballote 41 in gran consejo et 25 in scrutinio. Or la sera, per il stracho di tocharli la man et alegreza, li vene la febre et cadè aplopeticho. Or fece il suo testamento, et non havea figlioli, et mandò a donar do vasi di porfido belissimi a la Signoria nostra, et quelli fo di ordine dil collegio posti ne le zoje.
     
     
      Sumario di nove mandate a la Signoria nostra per li oratori nostri vanno in Franza,
      scrite a dì 29 zugno.
     
      Se dice che fiorentini sono d'acordo con el ducha de Milam, et che Fracasso va a lhoro soccorso contra pisani con 200 lanze, ancora che sia chi a Lorencino de' Medici che dissimula molto di questo (sic).
     
      Li ambasatori di Spagna vechii et nuovi sono chi a che homo non li parla (sic), che monsignor de Roham e il gram cancelario menano le cosse secretamente che non se intendano.