Tamen, el ducha di Milan, per dubito di quello li è per intravegnir, ch'è di perder il stado, mostrava venir alquanto piacevole con l'orator nostro, facendoli più ciera di l'usato. Pur ajutava fiorentini, et si crede habia di gran ducati, et in quelli haver gran speranza; ma nostri fevano ogni provision etc.
     
     
      Sumario di una lettera di Domenego Malipiero provedador in armata,
      data a le Foze di Pisa, a dì 12 lujo.
     
      Da novo, mò terzo zorno intrò in Ligorne una nave di 800 bote e una caravela e uno brigantino de corsari francesi, con una nave de Mesina di 600 bote che haveano presa carcha de grano e formazi che andava a Zenoa. Li fusemo apresso uno geto di bombarda; ma vedendo che non era pasto per nostri denti, non fessemo altro etc.
     
     
      Sumario di una lettera di Vicenzo Valier pagador a Pisa,
      data a dì 27 lujo 1498 a Vicopisano. Nara la barufa seguita.
     
      Eri, hessendo un caligo grandissimo, Paulo Vitelo ussite fuori de lo alozamento con squadre tre de zercha balestieri 100 per una, e do squadroni de homeni d'arme con do di fanteria e certe artigliarie menude, e andorono asaltar la scorta nostra del sacomano che era verso la Vagliana. E per rispeto del caligo, i cavali lezieri de li nemici asaltorono le vedete nostre e insieme con lhoro furono adosso i nostri, adeo che 'l forzo dei nostri non hebeno tempo de meterse i elmeti. La scorta, per sua desgratia tochò quel zorno a misier Zuam Gradenigo, a Francho dal Borgo capitanio di balestrieri et a Gurlin, quali se trovò con zercha 60 dei soi che fezeno un pocho de testa, et lui, vedendo i nemici cussì grossi, cerchò de salvarsi.