Francho dal Borgo li caschò el cavalo sotto e fo fatto prexon. Quel poveromo de misier Zuanne, volendosi alazar l'elmeto, li fu dato di un pasador, e chi dize de lanza nel volto e do altre feride, e fu morto lì, et quatro dei sui homeni d'arme furono presi, et zercha 12 o 14 cavali de' sacoman. Questo è praecise quanto è seguito. Nui subito, con li stratioti e zente d'arme, usisemo a la campagna e se aviasemo a la volta soa conzadi in bataglia. Loro se retirono, et i nostri cavali lizieri s'atacorono un bon pezo, e fono feriti de li sui e de li nostri. El signor don Ferante ozi [1027] è venuto ad alozar a Setimo, miglia uno lontano da Cassina. Serà lì etiam misier Zuam Diedo, al qual, piacendo cussì a la illustrissima Signoria, questo magnifico provedador li darà la mità di la conduta del q. misier Zuam Gradenigo, l'altra metà a misier Filippo Albanese, per esser valentomeni et portarse ben su questa guerra.
     
     
      Sumario di un'altra lettera venuta ut supra data a dì 27 lujo, ricevuta a dì 3 avosto.
     
      El corpo dil dito Zuam Gradenigo, per Paulo Savello che era in Pontadera loco de' inimici, a richiesta de' nostri fo dato et portato in Pisa a dì 27 da matina, che fo el zorno driedo la barufa. Et la sera i nemici lo mandono a Cassina, et fu portato in Pisa acompagnato di molti cavali su una sbara su doi muli, uno davanti e l'altro da driedo, et fu posto a Pisa in la chiesia de Santa Croxe, et li fo fato honorifice exequie etc.
     
      Et benché scrivesse che 'l fo morto da uno stratioto, ho inteso meglio la verità. La quale è come, eri matina, essendo andato el ditto a la scorta a la Fornaseta et Chabiancha, se messe tra lui et Carlo da Bologna con doy altri andar più avanti de la squadra forsi uno miglio verso Gelo, et i nemici li fono driedo, e lui corse fino a la squadra e i nimici driedo, fra i qualli li era homeni d'arme et balestrieri a cavalo.