Et advisoe li provedimenti fati da poi, et come fiorentini erano molto ingrossati sì di zente d'arme come di balestrieri a cavalo, provisionati e fanti, adeo haveano 200 homeni d'arme più di nostri. Però, dimandavano fusse cresuto l'exercito etc. Et come la conduta dil Gradenigo havia data a Zuam Diedo et Lazarin de Rimano per mitade, fino la Signoria ordinava quello si habi a far.
     
      Item, che Zuam Griego non era ancora gionto, et che la via di Barga era pur pericolosa per le zente vi era a custodia di quel passo.
     
      Item, come havia fato 500 provisionati etc. et par che zà alcuni zorni cassoe certi stratioti per esser inuteli, et quelli fuziteno nel campo nemico.
     
      Vene in questa terra a li 2 zercha 22 cavali di stratioti venuti al vadagno da Modon, et per la Signoria nostra li fo dato stipendio, et datoli danari, et mandati a Ravena col provedador nostro electo in Romagna et nominato di sopra. Et come partirano, noterò al loco suo.
     
      Ancora, vene do fioli dil signor Jacomazo di Rossi fo fiol dil conte Guido, el qual habita in veronese ... et poi lui, et zà have conduta di cavali ... con la Signoria nostra; ma quella renoncioe et in villa stassi. Or questi do zoveni assà disposti, voleva conduta, et andar a li confini di Parma dove è li lhoro castelli, et star preparati per dar adosso a Milano.
     
      [1498 08 05]A dì 5, nel consejo di pregadi, vedendo nostri el bisogno di Pisa et fiorentini esser ingrossati, et non esser tempo di più dimora, imo far da valenti homeni, et disputato la materia, terminono mantegnir Pisa.