Et fo conosuto da uno Nicolò de Vidal ch'è capitanio di la grassa, et posto voluntarie in barcha con promission di vogarlo fuora, al qual si fece dar ducati 16 et una taza d'argento, et fato star basso fino che vene li capitanii nostri. Et a hore 3 di notte, fo remenato in camara nuova dil tormento, et ivi la matina el vidi vestito di frate. Adoncha questui, voleva scampar. Et per intelligentia dil modo, è da saper che 'l stava in Toresele; ligò li do guardiani come ho ditto, si fé vogar a Lio, et uno Graciul scudiere dil principe el chonosete e disse a colui el vogava: "Varda e meti mente dove tu vuogi questui, perché l'importa." Et cussì questo fante, che era di sier Jacomo di Prioli de sier Domenego, butato a Lio dove era altri stratioti, zoè quelli venuti novamente per aver soldo, con questui era do vestiti a la grecha, et lo remandoe a Castello per veder di tuor una barcha di peota a cinque remi, et fenzeva a voler andar a Loreto. Et nel ritorno, trovò questo Nicolò de Vidal con la sua barcha di officiali per numero 4, ch'è di l'oficio di la ternaria nuova, e disse: "Habi a mente che ho vogà a Lio Zorzi Zernovich, e vado per una barcha di peota." Et esso Nicolò andò a Lio et nulla trovoe. In questo mezo, venuto in piaza, era hore una di note, Alvise Marenti secretario dil consejo di X, ordinò a Zuam Piero di le Majete capitanio di le barche dil consejo di X, Zenoa, Vasalo et altri capitani, che con barche andasseno parte verso li do castelli, altri a San Zorzi Mazor, e tutte le barche dovesseno zerchar si 'l trovava questo Zorzi Zernovich e retenirlo, dubitando over il tolesse la via di mar, over di Ferara.