Sumario di una lettera data a Cassina, a dì 5 avosto 1498.
     
      A dì 29 lujo, il magnifico proveditor fece levar misier Filippo Albanese et il capitanio Jacomo di Tarsia de Vico, et venir qui a Cassina con le lhoro zente per segurtà de l'exercito nostro, per essersi diminuito de fanterie, et li inimici molto acresciuti de ogni sorte zente, videlicet homeni d'arme 400, ballestrieri a cavalo 600, per quanto se dice, et fanti 4000, et ancora aspetano altra zente di Orsini et di la Chiesia, et hano comandati assai zente loro paesani, et che poi voleno intrar in campagna a' danni nostri, et praecipue menazano de venir a campo qui a Cassina, over a Pisa con le artigliarie grosse et minute che hanno preparate a Pontadera, zoè tre cultaldi et assaissimi passavolanti. Et cussì, di zorno in zorno, se dubita siano per saltar in campagna a qualche uno di questi lochi, et a l'incontro non se li pò star, per esser la mità più zente di nui. Poi etiam gran parte de li fanti boni erano de qui che fece, 3 per zorno se ne sono fuziti et iti da li inimici. Et par che per tal suspeto, si rasona li nostri, per conservation di l'exercito, volerlo redur in Pisa, et fornir queste doe castelle principal benissimo de fantarie. Et questo si farà segondo se governerà li inimici intrando in campagna et aproximandose a nui. Hora li nostri fano fantarie in pressa. Hasse fato questi zorni alquanti contestabeli, che son: Cristophoro Albanese fanti 200, Ragazo fradello di Gorlin 100, Hironimo Tartaro da Padoa 50, Zuam Negro da Venecia 50, Bortolo da Cioli 50, Rigo acresuto fin a 50, Spadacin de Imola 50. Et a judicio di tutti, saria stà gran bene che domino Zuan Paulo Gradenigo fusse de qui rimasto proveditor, che le cosse sariano passate altramente, et maxime in proseguir la victoria, che hora non se saria in questi affani.