Questo solo sarà al presente.
     
      A dì ditto, fo electo nel mazor consejo vicedomino a Ferara Hironimo Donado dotor, era orator al summo pontifice, el qual vene per scrutinio, et fo [1044] preso parte di resalvarli a risponder di acetar tre zorni da poi sarà zonto qui. Era a Ferara vicedomino Bernardo Bembo doctor et cavalier, et il ducha di Ferara pur pratichava di qualche adatamento con la Signoria nostra et Milano et fiorentini, et quel suo Zuam Alberto da la Pigna veniva spesso quivi.
     
      In questi zorni, fo pratichato con senesi di tuorli in protetione. Restava solum lo adatamento di pagar Anton Maria di Sanseverino lhoro capitanio per la portion di quello pagava el ducha di Milan. Quello seguirà, scriverò poi.
     
      Et per Bajoni vene la comission lhoro a uno doctor chiamato Paulo da Ruigo, over da Fuligno, el qual era ogni matina a la Signoria per capitolar, perhoché ditti Bajoni voleno venir al tutto al stipendio nostro con homeni d'arme 100, videlicet do fratelli, el signor Nestor et ... et li davano ducati 15 milia a l'anno per anni ...
     
      El signor di Piombin, el voleva ducati 20 milia et 200 homeni d'arme, et fo dato libertà a Piero Duodo a Pisa dovesse concluder.
     
      Qui sarà scripto una digressione et successo di fiorentini. Prima, come al principio di avosto, fiorentini mandono nel suo campo, che era a Pontadera et Calzinaja, quatro citadini in quatro zorni, ogni giorno ne andava uno, con danari, i qualli fono: il magnifico Joannino de' Medici, Alfonxo Strozi, Agnol de' Bardi et Beneto de' Nerli.