Tandem, queste sono parole dil vulgo. Date in Stempes, a dì 13 avosto 1498. El reverendissimo cardinal di San Malò, eri in questa terra è arivato.
     
     
      Copia di una lettera scrita a sier Francesco Zorzi de sier Hironimo el cavalier,
      data a dì ut supra per Dyon.
     
      Magnifico misier. Dopo la partida mia, non ho scrito a la magnificentia vostra per non esser acaduto, et etiam per la promessa fata a quella. Quando me partì, promisse che quando zonzeremo a Paris scriverli. A dì 5 del presente, zercha hore 22, zonzessemo a Paris, et ne vene incontra el dì avanti fino a Longumeu misier Alexandro Malhabai maistro di [1050] caxa dil re, con maistro Thodaro et el nipote di misier Zuam Jacomo di Triulzi con la sua famiglia. Poi, quando partissemo da Longumeu, andassemo verso Paris, ne vene incontra molti grandi signori, primo uno signor de monsignor de Lorena, non so el suo nome, vene fino a Bolaraina, lige 3 longe di Paris, con cercha cavali 60. Despò venerono molti altri signori; despò vene monsignor di Lignì con cavali 1000 in cercha e con molti arcieri de la guarda, li qualli ne fesseno grande honor, et non voleva che nisuno se metesse fra nui altri. E tutti dicevano che mai non hanno visto più bella ambasada de questa. Ne feseno compagnia fino a lo alozamento, che fo la caxa di misier Piero Parente thesorier del re in la rugna de le Provelle arente Sancto Eustachio, dove fossemo benissimo alozati. Et lì fossemo per fino a la vigilia di San Lorenzo. Se partissemo, et andassemo quel dì ad alozar a Zatras soto Montehelzo.